Монгол Улсын Засгийн газар, АНУ-ын Мянганы сорилтын корпорацын байгуулсан гэрээний хүрээнд Усны Компактын гурван төслийг манай улсад хэрэгжүүлж байна.
Үүний нэг нь усны салбарын тогтвортой байдлыг хангах төсөл бөгөөд нийслэлийн зургаан дүүргийн гэр хорооллын шугамд холбогдсон 180 ус түгээх байрыг бүрэн автоматжуулж, 24/7 ажиллагаатай ухаалаг болгож, 09 сарын 23-нд Ус сувгийн удирдах газарт хүлээлгэн өгөв. Сонгинохайрхан дүүргийн II хорооны нутаг дэвсгэрт байрлах 207-р худгийн гадаа талбайд болсон энэхүү үйл ажиллагаанд УИХ-ын гишүүн, Хууль зүйн байнгын хорооны дарга Д.Цогтбаатар, УИХ-ын гишүүн, Төсвийн байнгын хорооны дарга Х.Ганхуяг, АНУ-аас Монгол Улсад суугаа Онц бөгөөд Бүрэн эрхт Элчин сайд Ричард Буанган, УСУГ-ын дарга Ц.Төрхүү, Монголын мянганы сорилтын сангийн гүйцэтгэх захирал Э.Энхгэрэл тэргүүтэй албаныхан, зочид төлөөлөгч, тус хорооны иргэд оролцлоо.
Улаанбаатар хотын хэмжээнд нийт 700 гаруй ус түгээх байр байдгийн 180-ыг нь Усны Компактын санхүүжилтээр автоматжуулжээ. Бүрэн автоматжуулсан 180 ус түгээх байрын 61 нь Сонгинохайрхан, 51 нь Чингэлтэй, 26 нь Хан-Уул, 25 нь Баянзүрх, 11 нь Баянгол, 6 нь Сүхбаатар дүүрэгт байрлаж байгаа аж. Төсөл хэрэгжсэнээр дээрх 180 ус түгээх байрын үйл ажиллагааг нэгдсэн хяналтад оруулж, УСУГ-ын Хяналт, удирдлагын төвөөс зайнаас хянах боломжтой болж, иргэд ухаалаг гар утасны аппликейшн, усны карт болон утасны дугаараа ашиглан ус авч болох аж.
Усны Компакт гэрээ нь 2021 оны гуравдугаар сарын 31-нээс 2026 оны гуравдугаар сарын 31 хүртэл хэрэгжих бөгөөд АНУ-ын талаас 350 сая ам.долларын буцалтгүй тусламжийн дэмжлэг үзүүлж байгаа юм. Харин Монгол Улсын Засгийн зараас 111.76 сая ам.долларын хөрөнгө оруулалт хийж байна.
Энэ үеэр, УИХ-ын гишүүн Д.Цогтбаатар: “Цаасан дээр үзэглэж байсан Компакт гэрээний төсөл, хөтөлбөрүүд хөрсөн дээр бууж албан ёсоор хүлээлгэн өгч байгаад баяртай байна. Энэ ажил бол цаашид хүлээлгэн өгөх олон бүтээн байгуулалтын эхлэл юм. Ирээдүйд хамтын хүчээр Улаанбаатар хотын усны асуудлыг цогцоор нь шийдвэрлэх бат бөх суурь болно гэдэгт итгэлтэй байна” гэв.
АНУ-аас Монгол Улсад суугаа Онц бөгөөд Бүрэн эрхт Элчин сайд Ричард Буанган: “Улаанбаатар хотыг цэвэр усаар тогтвортой хангах боломжтой болсноор хувийн хэвшил бизнесүүд тэлэх, цаашлаад нийслэлийн хотын эдийн засаг урт хугацаанд өсөж хөгжих бат бөх суурийг тавьж байна” хэмээв.
УСУГ-ын дарга Ц.Төрхүү: “Энэ төсөлтэй эхнээс нь дуустал хамт байсандаа баяртай байна. Ус түгээх төвийг автоматжуулснаар иргэдийн цаг завыг хэмнэхээс гадна эдийн засгийн хувьд бидэнд ч үр өгөөжтэй боллоо. Учир нь, энэ байрыг бүрэн автоматжуулж, шугамд холбосноор өмнө нь хүлээдэг байсан 40 төгрөгийн алдагдал 10-15 болтлоо буурсан” гэлээ.
