“Парис-2024” Паралимпын наадмын хаалтын ёслол ням гарагийн үдэш болж өнгөрлөө. Харин дараагийн зуны Паралимп 2028 онд АНУ-ын Лос-Анжелес хотноо болох аж.
Хаалтын үеэр Францын электроник урсгалын 24 уран бүтээлч ширүүн бороог үл хайхран “Стад де Франс” цэнгэлдэх хүрээлэнд 168 орны 4400 тамирчны өмнө ёслолын уур амьсгалыг бүрдүүлэн үзүүлбэр үзүүлжээ.
Цаг агаарын тааламжгүй нөхцөл ёслолын зарим үйл ажиллагаанд саад болжээ. Орой бүр агаарт хөөргөдөг, Паралимпын галыг байрлуулсан агаарын бөмбөлөг мэт хэлбэртэй тогоо хүчтэй салхи, борооны улмаас ням гарагт Тюильри цэцэрлэгээс хөөрч чадсангүй гэж зохион байгуулагчид мэдэгдсэн байна. Францын бочи спортын тамирчин Аурели Оберт Паралимпын галыг унтраах үед зохион байгуулагч орны бусад тамирчин түүнийг хүрээлэн зогсож байлаа.
Хаалтын ёслолын үеэр Бродвейн од Али Стокер Америкийн төрийн дууллыг дууллаа.
Харин Америкийн рэппер Андерсон Пак тэргүүтэй уран бүтээлчид Лос-Анжелест болох дараагийн наадамд үзэгчдийн сонирхлыг татахын тулд тус хотын Венисийн эрэг дээр тоглолт хийсэн байна.
“Парис-2024” Паралимпын наадмын медалийн хүснэгтийн тэргүүнд Хятадын баг тамирчид 94 алт, 76 мөнгө, 50 хүрэл медальтайгаар бичигдлээ. Харин Их Британи 49 алт, 44 мөнгө, 31 хүрэл медаль хүртсэн амжилтаар удаалсан бол АНУ-ын тамирчид 36 алт, 42 мөнгө, зургаан 27 медаль хүртсэнээр гуравдугаарт жагсжээ. Тэдний араас Нидерланд, Бразил, Итали, Украин, Франц, Австрали, Японы баг тамирчид эхний 10-т бичигдсэн байна.
Эх сурвалж: BBC
