Ардын уран зохиолч Ш.Сүрэнжавын хөшөөг Үндэсний цэцэрлэгт хүрээлэнд босголоо

Монгол Улсын Төрийн соёрхолт, Ардын уран зохиолч, XX зууны утга зохиолын томоохон төлөөлөгч Ш.Сүрэнжавын дурсгалын талбайг өчигдөр Үндэсний цэцэрлэгт хүрээлэнд нээлээ. Энэ үеэр Шаравын Сүрэнжавын дурсгалд зориулсан гэрэлт хөшөөний нээлт болов.

Ардын уран зохиолч Ш.Сүрэнжавын дурсгалын талбайд их яруу найрагчийн “Би тэнгэрийн хүү”, “Нэр”, “Ээж минь”, “Амьдрал минь, би чамд хайртай”, “Бүсгүйчүүл”, “Миний нутгийн бараа”, “Намуун үдэш”, “Миний ардын сэтгэл цагаан”, “Арав дахь хавраа үдье”, “Нэрээр хийсэн шүлэг”, “Дөрвөн мөрт” зэрэг олон сайхан бүтээлийг уншиж танилцах боломж бүрдүүлжээ.

Гурван метрийн өндөртэй хүрэл гэрэлт хөшөөг Төрийн шагналт, уран барималч Ц.Амгалан болон нэрт соён гэгээрүүлэгч Б.Ренчин агсны ач хүү уран барималч Б.Дэнзэн нар урлажээ.

Монгол Улсын Төрийн шагналт, Ардын уран зохиолч Шаравын Сүрэнжав “Ерэн баатрын дууль”, “Багш”, “Би тэнгэрийн хүү”, “Миний Монгол”, “Ард Монгол”, “Гар” зэрэг иргэний утга уянгын шүлэг найраглал хийгээд “Хэрлэнгийн барьяа” роман, “Амьд явбал нэгийг үзнэ”, “Мартаж болшгүй он жилүүд”, “Долгионт жилүүдийн туужис” зэрэг эсээ дурсамж бичсэн бол эрийн гурван наадмын тухай өгүүлсэн кино зохиолоор нь “Гарьд магнай”, “Тод магнай”, “Цэц магнай” уран сайхны кино бүтээжээ.

Мөн түүний эрийн гурван наадмын тухай өгүүлсэн уран сайхны киноны зохиолоор нь “Гарьд магнай”, “Тод магнай”, “Цэц магнай” уран сайхны кино бүтээсэн юм. Мөн их найрагчийн шүлгээр бүтсэн “Арав дахь хавраа үдье”, “Намуун үдэш”, “Миний нутгийн бараа”, “Миний ардын сэтгэл цагаан”, “Итгэлийн дуу”, “Торгон хилийн зүг”, “Сувилагч чамдаа баярлалаа”, “Бүсгүйчүүд”, “Тольтой мөнгөн эмээл”, “Онцгой төрсөн бүсгүй”, “Малчин ааваа магтан дуулъя”, “Хэрвээ би эр хүн бол доо…”, “Миний ном”, “Сайн уу, муу юу, аль нь вэ хө?” зэрэг олон арван дуу монгол түмний дунд эгшиглэсээр байна.