Дэлхийн шатрын холбоо, АНУ-ын Чикаго хотын Шерифийн холбооноос хамтран Дэлхийн аварга шалгаруулах шатрын тэмцээнийг дөрөв дэх жилдээ зохион байгууллаа.
Энэхүү тэмцээн онлайнаар болж ШШГЕГ-ын 407 дугаар нээлттэй, хаалттай хорих ангийн хүмүүжигчдийн баг түрүүлж, гурав дахь удаагаа дэлхийн аварга болжээ. Дэлхийн 60 орны 150 гаруй тамирчин өрсөлдсөн тус тэмцээнд манай баг тамирчид хэсгийн шатанд Энэтхэгийн нэг, хоёрдугаар баг болон Казахстан, Гүрж, Киргизстаны багийг хожиж, нэг ч хожигдолгүйгээр хэсгээ тэргүүлжээ. Хасагдах шатанд Латвийг, хагас шигшээд Румыныг, аваргын төлөө Эльсалвадорыг хожиж аваргын алтан медаль хүртсэн байна.
Түүнчлэн шатрын спортын ач холбогдлыг сурталчлан таниулах, түгээн дэлгэрүүлэх, үр нөлөөг нийгэмшүүлэх ажилд нэвтрүүлэх зорилгоор 407 дугаар нээлттэй, хаалттай хорих анги “Шатар таны амьдралд” хөтөлбөрийг боловсруулан бүх нийтийн сургалт, тэмцээн, уралдаан зохион байгуулахаар ажиллаж эхэлжээ.
