Монгол улсын өсвөрийн шигшээ баг JDC буюу Өсвөрийн Дартс Корпорациас зохион байгуулдаг Junior World Darts Championship 2024 тэмцээнд гурав дахь жилдээ амжилттай оролцлоо.
Тэмцээн Английн хилийн чанад дахь Гибралтар улсад 11 дүгээр сарын 24-29-ны хооронд болж өндөрлөв.
Тус тэмцээнд өсвөрийн шигшээ багийн ахлагч, Монгол Улсын өсвөрийн 3 удаагийн аварга, Бянзүрх дүүргийн 44-р сургуулийн 9и ангийн сурагч Х.Тэргэл Holiday “Inn Express Junior World Darts Championship 2024” тэмцээнд 3-р байр, JDC World Cup of Darts 2024 тэмцээний хошой хүрэл медальтан боллоо. Х.Тэргэл нь “MGL Darts” клуб, “Уужим Од” ХХК, Winmau Team 360 багийн анхны Монгол тамирчин юм.
“MGL Darts” клубийн тамирчин, Бянзүрх дүүргийн 44-р сургуулийн 9и ангийн сурагч Г.Ананд “JDC World Cup of Darts 2024” тэмцээний хошой хүрэл медальтан боллоо. Тэрээр “JDC World Cup 2022” тэмцээний хүрэл медальт, JDC Cadet хөтөлбөртэй анхны гэрээг байгуулсан 4 тамирчдын нэг юм.
Бянзүрх дүүргийн 44-р сургуулийн 9и ангийн сурагч Ц.Өнөрчимэг “Gibraltar Open Ladies” тэмцээнд 2-р байрт шалгарч мөнгөн цом, “JDC World Cup of Darts 2024” тэмцээний хүрэл медальтан боллоо. Ц.Өнөрчимэг нь “JDC World Cup 2023” тэмцээний 5-р байр, 2024 оны Өсвөрийн УАШТ-ний хүрэл медальт, “Хөх Угалз” клубийн тамирчин билээ.
“Junior World Darts Championship 2024” тэмцээнд Монгол улсын өсвөрийн шигшээ багт орон нутгаас анх удаа уригдан оролцохоор болсон Өмнөговь аймгийн Цогтцэций сумын “Saturn 180” клубын өсвөрийн шилдэг эмэгтэй тамирчин, Т.Борын нэрэмжит 1 дүгээр сургуулийн 12б ангийн сурагч Б.Энэржин “Gibraltar Open Ladies” тэмцээнд 3-р байрт, мөн “JDC World Cup of Darts 2024” тэмцээнээс хүрэл медаль хүртлээ. Тэрээр Өмнөговь аймгийн дартсын аварга шалгаруулах тэмцээний эмэгтэй ганцаарчилсан болон өсвөрийн аварга, Багануур Опен тэмцээний эмэгтэй дан хосын аварга, WDF Mongolian Open 2024 тэмцээний өсвөрийн хүрэл медальт тамирчин юм.
