2025 оны 4-р сарын 15-нд Европын Комисс “Leqembi” хэмээх Альцгеймерийн өвчний шинэ эмийг Европын Холбоонд албан ёсоор баталжээ. Энэ нь Альцгеймерийн өвчний үндсэн шалтгаан болох тархины β-амилоид уураг хуримтлалыг бууруулж, өвчний явцыг удаашруулах анхны эм юм.
Тус эмийг Японы Eisai болон АНУ-ын Biogen компаниуд хамтран боловсруулсан бөгөөд олон улсын 1,795 оролцогчтой CLARITY AD судалгаагаар 18 сарын хугацаанд танин мэдэхүйн доройтлыг 27%-иар бууруулсан үр дүн гарчээ.
Энэхүү эм альцгеймерийн өвчний эхэн үе шат буюу хөнгөн танин мэдэхүйн алдагдалтай болон хөнгөн дементитэй хүмүүст зориулагдсан аж.
Харин эмийн гаж нөлөөний тухайд, тархины хаван (ARIA-E) болон тархины цус алдалт (ARIA-H) зэрэг ховор боловч ноцтой гаж нөлөө илэрч болзошгүй тул эмчилгээний явцад MRI шинжилгээг тогтмол хийх шаардлагатай.
Тус эм Европт эмийн зах зээлд нэвтрэх үйл явц хэдэн сарын дараа эхлэх төлөвтэй байна.
