УИХ-ын даргын 93 дугаар захирамжаар байгуулагдсан “Хүний эрхийг хангах үндэсний 2 дугаар хөтөлбөр батлах тухай” УИХ-ын тогтоолын төсөл боловсруулах үүрэг бүхий ажлын хэсгийн анхны хуралдаан 9 дүгээр сарын 26-нд боллоо.
Хуралдаанд ажлын хэсгийн гишүүд шаардлагатай судалгаа, мэдээлэл авах зорилгоор холбогдох төрийн байгууллага, судлаач, мэргэжилтэн, албан тушаалтнуудыг оролцуулав. Түүнчлэн ажлын хэсгийн үйл ажиллагааны төлөвлөгөө, цаглаварын талаар болон хуулийн төсөл боловсруулахад гишүүдэд шаардлагатай судалгаа, мэдээллээр хангах асуудлыг хэлэлцлээ.
“Хүний эрхийг хангах үндэсний 2 дугаар хөтөлбөр батлах тухай” Улсын Их Хурлын тогтоолын төслийг боловсруулж, 2024 оны намрын ээлжит чуулганы хугацаанд өргөн мэдүүлэх үүрэг бүхий тус ажлын хэсгийг Улсын Их Хурлын даргын 2024 оны 93 дугаар захирамжаар байгуулсан юм. Тус ажлын хэсгийг Улсын Их Хурлын гишүүн Х.Баасанжаргал ахалж, бүрэлдэхүүнд Улсын Их Хурлын гишүүн О.Батнайрамдал, Ж.Баярмаа, Ж.Баясгалан, Д.Бум-Очир, Ч.Лодойсамбуу, Б.Мөнхсоёл, М.Нарантуяа-Нара, О.Номинчимэг, О.Саранчулуун, Б.Энхбаяр нар ажиллаж байна.
“Хуралдаанд Иргэний Нийгмийн Байгууллагуудын төлөөллүүд болон ХЭҮК, Засгийн газрын хууль, эрх зүйн мэргэжилтнүүд оролцож хөтөлбөрийн шинэчлэл, хүний эрхийг хангах суурь зарчмууд зэрэг Хүний Эрхийг тойрсон олон асуудлыг хөндөж, энэхүү ажлын хэсэг цаашид өргөн цар хүрээтэй ажиллаж, хөтөлбөрийн хэрэгжилтийг дүгнэх юм” хэмээн УИХ-ын гишүүн М.Нарантуяа-Нара өөрийн цахим хуудсаар дамжуулан мэдээлжээ.