Энэ жил 70 насны босгыг алхаад буй Хонг Конгийн алдарт жүжигчин Жаки Чаны тоглосон “Panda plan” кино 10-р сарын 7-нд нээлтээ хийхээр болжээ. Уг кинонд алдарт жүжигчин Жаки Чан амьтны хүрээлэнгийн Ху Ху нэртэй пандаг олон улсын алдартай гэмт хэргийн бүлэглэлийнхний гарт орохоос аврахаар хичээж буй адал явдлын тухай өгүүлэх юм.
Тэрээр жүжигчин, найруулагч, продюсер, тулаанч, кино зохиолч, бизнес эрхлэгч, дуучин бөгөөд авьяас чадвар шаардсан акробатын үзүүлбэр болон хошин өнгө аясаараа үзэгчдийн хайр хүндэтгэлийг хүртсэн билээ.
5 настайгаасаа туслах дүрд тоглон жүжигчний карьераа эхлүүлсэн бөгөөд 10 жил тулааны урлаг болон акробатаар тууштай хичээллэсэн. 1962 онд “Big and little Wong Tin Bar” , 1963 онд “The love Eterne”, 1966 онд “Come Drink with me” кинонд тус тус тоглосон.1971 онд “A Touch Of Zen” кинонд тоглосноор албан ёсоор карьераа эхлүүлсэн. Түүний анхны гол дүр 1973 оны дэлгэцийн бүтээл “Little Tiger Of Canton” байжээ. Тэрээр 1960 оноос эхлэн 150-аад кинонд өөрийн дүрээ мөнхөлсөн байна.
Мөн Жэки Чан маш сайхан дуулдаг бөгөөд 1984 оноос хойш 20 цомог гаргасан ба дуунууд нь Кантон аялга, Мандарин аялга, Япон, Тайван болон Англи хэл дээр гарсан. Ихэвчлэн өөрийн киноны дууг дуулдаг ба Чаны анхны дуу нь “Залуу Мастер” киноны “Кунг Фугээр Зодолдогч Эрэгтэй” нэртэй дуу байсан юм.
“Panda Plan” киноны албан ёсны трейлер
