“Grand stage awards” мэргэжлийн дуурийн дуулаачдын олон улсын уралдаан ОХУ-ын Москва хотноо болж өндөрлөжээ.
Энэхүү олон улсын уралдаанд М.Гнесинийн нэрэмжит ОХУ-ын хөгжмийн академийн магистрантур Б.Доржнамжин гранпри, ДБЭТ-ын дуучин Х.Бямбарагчаа тэргүүн байр, мөн Ж.Россинийн нэрэмжит тусгай шагналын эзэн болсон байна.
Москвагийн олон улсын хөгжмийн ордон болон Европын “Opera Globe Artist” менежментийн агентлагаас зохион байгуулсан уг уралдааныг гурван үе шаттай зохион байгуулсан. Эхний шалгаруулалтад Беларусь, Казахстан, Киргиз, Армени, Гүрж болон БНХАУ, БНСУ, ХБНГУ, Австри, Грек, АНУ, Израил, Словенийн дуурийн урлагийн чансаа өндөр 179 мэргэжлийн дуучин өрсөлджээ. Тэдгээрээс шүүгчдийн бүрэлдэхүүн 50 оролцогчийг хоёрдугаар шатанд шалгаруулж, сүүлийн шатанд ОХУ, Монгол, Армени, Германы шилдэг 20 дуучин тунасан аж.
