12 дугаар сар гармагц хүн бүр шинэ жилийн баярыг хоног тоолон хүлээдэг. Сүрлэг сайхан гацуур мод, өнгө өнгийн гэрэлт тоглоомууд, шинэ жилийн тухай дуу, сэтгэлд хоногшсон кинонууд гээд баярын уур амьсгал оруулж, сэтгэл дулаацуулах зүйлс бишгүй бий.
Үүний нэг бол яах аргагүй “Home alone” буюу “Гэртээ ганцаараа” инээдмийн кино билээ. Адтай сэргэлэн хүү бүтэлгүй хулгайчдаас гэрээ хамгаалж буй хөгжилтэй түүхийг хэд ч үзсэн уйдахааргүй агаад хүн бүхний үзэх дуртай кино гэхэд хилсдэхгүй биз.
Уг кино 1990 оны 11-р сарын 10-нд нээлтээ хийсэн бөгөөд АНУ-ын кино найруулагч Крис Колумбус найруулсан юм. Уг найруулагч “Харри Поттер” цувралуупыг найруулж байжээ. Энэхүү кино “Box Office”-т өндөр амжилт гаргаснаас гадна тус киногоор гурван видео тоглоом, нийт дөрвөн цуврал кино бүтээсэн. Тодруулбал, 1990 оны “Гэртээ ганцаараа”, 1992 оны “Гэртээ ганцаараа 2:Нью-Йокт төөрсөн нь”, 1997 оны “Гэртээ ганцаараа 3” болон 2002 оны телевизэд зориулсан “Гэртээ ганцаараа 4” кинонууд юм.
Киноны гол дүр Кевин Маккалистер хүүгийн дүрд АНУ-ын жүжигчин Маколей Калкин тоглосон юм. Калкин 1980 оны 8-р сарын 26-нд Нью-Йорк хотод төрсөн. 4 настайгаасаа эхлэн жүжиглэж эхэлсэн бөгөөд кино жүжигчний карьераа 1988 онд “Rocket Gibraltar” уран бүтээлд тоглон эхлүүлж байжээ.
Харин 1990 онд “Гэртээ ганцааараа” киноны гол дүрд тоглож үзэгчдийн хайр хүндэтгэлийг хүлээсэн юм. Тус уран бүтээл Алтан бөмбөрцөг наадмын “Шилдэг инээдмийн кино”-гоор тодорсон бөгөөд Калкин “Шилдэг залуу жүжигчин” шагналыг хүртсэн.
10 настай Маколей “Гэртээ ганцаараа” кинонд тоглосны дараа түүнд ирсэн алдар хүндээс болж хүүгийн аав Кристофер Калкин олон сая доллар амласан кинонд л хүүгээ тоглуулахыг зөвшөөрсөн байна. Үүнээс болж Маколейн 13 насандаа жүжигчний карьераа түр завсарлаж байжээ.
23 насандаа кино ертөнцөд эргэн хөл тавьсан бөгөөд “Party Monster”, “Saved” хэмээх кинонуудад дүр бүтээсэн. Харин дараа нь хөгжмийн ертөнцөд хүч түрэн орж “The Pizza Underground” хамтлагийг үүсгэн байгуулжээ. Гэхдээ Калкин кино ертөнцөө тэр чигт нь орхилгүй “Kings”, “Drivers”, “Land of Change” зэрэг кинонд тогложээ.
2017 онд жүжигчин Бренда Сонтой үерхэж буйгаа зарлан, 2021 оны 4-р сарын 5-нд анхны хүүгээ өлгийдөн авсан. Харин 2022 оны 12-р сард удаах хүү нь мэндэлжээ.
Үзэгч бидний сэтгэлд 10 насны дүрээрээ мөнхөрсөн Кевин хүү энэ жил 44 нас хүрчээ.
