Шөнө бүр ердөө 15 минутын нэмэлт нойр авах нь эрт нас барах эрсдэлийг бууруулах боломжтой аж.
Сиднейн их сургуулийн багш, биеийн тамирын судлаач профессор Эммануэль Стаматаксис The Independent сэтгүүлд өгсөн ярилцлагадаа, хэрэв та амьдралынхаа гурван хүчин зүйлийг бага зэрэг өөрчилбөл насжилтад асар их нөлөө үзүүлэх тухай дурджээ. Түүний судалгааны баг 60,000 хүний өгөгдлийг найман жилийн хугацаанд судалж, хэр удаан унтдаг, өдөрт хэдэн минут дасгал хийдэг, мөн хооллолтын чанарын оноо (DQS)-г нь тэмдэглэжээ.
DQS оноо нь 100-аас үнэлэгддэг бөгөөд хүнсний ногоо, жимс, загас, сүүн бүтээгдэхүүн, бүхэл үр, ургамлын тос, боловсруулсан болон боловсруулаагүй махны хэрэглээн дээр үндэслэдэг аж.
Өмнөх судалгаагаар Британи хүмүүсийн долоон хүн тутмын нэг нь өдөрт таван цагаас бага унтдаг нь тогтоогдсон бөгөөд энэ нь NHS-ийн зөвлөдөг 7–9 цагаас хавьгүй доогуур үзүүлэлт юм.
Стаматаксисын багийн тооцоогоор, хэрэв та ердөө 5.5 цаг унтаж, өдөрт 7.3 минут дасгал хийж, DQS оноо тань 36.9 байвал, жижигхэн өөрчлөлтүүд таны нас барах эрсдэлийг мэдэгдэхүйц бууруулна.
Тодруулбал:
- 15 минутын нэмэлт нойр
- 1.6 минутын нэмэлт дасгал хөдөлгөөн
- Нэг хагас порц хүнсний ногоо нэмэх (эсвэл долоо хоногт нэг порц боловсруулсан махыг хасах) нь нас барах эрсдэлийг 10 хувь бууруулна.
Харин илүү том өөрчлөлт хийвэл:
- 75 минутын нэмэлт нойр
- Өдөрт 12.5 минутын дунд болон хүчтэй дасгал
- DQS оноогоо 25-аар нэмэгдүүлж 61.9 болгосон тохиолдолд нас барах эрсдэл 50 хувь буурна.
Хүнсний ногоог хагас порцоор нэмэгдүүлэх жишээ: нэг брокколи, нэг халбага чанасан бууцай, нэг халбага чанасан байцаа, 2.5 см өргөн өргөст хэмх, эсвэл хагас том улаан лооль.
Боловсруулсан махнаас татгалзах жишээ: гахайн утсан мах, хиам, давсалсан мах, хотдог, салями, давсалсан үхрийн мах, спам
Өөр судалгаанууд боловсруулсан хүнсийг таргалалт, зүрхний өвчин, бүдүүн гэдэс болон хөхний хавдар, чихрийн шижин, дементэй холбоотой гэж үзсэн. Мөн хангалттай нойр авахгүй байх нь таргалалт, 2-р төрлийн чихрийн шижин, зүрхний өвчин, цус харвалтын эрсдэлийг нэмэгдүүлдэг.
